Schwimmbod - Geschichten_by_v3

Gloane Gschichdn aus Schweinersdorf

Dass, da Huaber, da Lehna, da Moar und Mesner gor ned richtig so ghoaßn ham, sondan, dass des de Hofnamen warn, hob i ersd vui schbäda gmerkd.
Mid de andan Kinda, da Lehna Kathl und da Maria, und da Mesner Margot hama aa öfdas gschbuid. D´Moar-Deandl warn scho z´groß fia uns.
D´Katherl war zwar aa scho a bissl älter wia mia, aber de hod si hi und do no mid uns obgebn. Und wia d´Oma und da Opa Goidane Hochzeid ghabd ham, samma mia Kinda olle im Küchnstübal um den langa Diisch rumgsessn und d´Katherl hod Zigareddn dabeighabd. I glaab domois ham de meisdn vo uns, s´erschde Moi g´rauchd im Lebn. Die Groußn san olle in da Stubn dringsessn und ham des gor ned gschbannd.

Jedn Samsdognachmiddog is da Hof zammgramd worn, damid ois sauba ausschaugd. Friah war no a Kies im Hof, aber wia dan ois teert worn is, ham de Kinda oiwe an Hof zamkiahn miassn. Des hod ganz schee lang dauad, bei dem grossn Hof.
Da Onkl Schoß, hods öfdas midm Kreiz ghabd und is deswegn, wenn er Zeid ghabd hod, zum Schwimma gfahrn. Ofd war des im Winta und dann hod er seine Deandl und mi aa midgnumma ins Moosburger Hallenbad.

Amoi war i aa dabei, beim Schuahkaffa in Moosburg beim Gerlsbeck, weils neie Schuah brauchd ham. Do hods so scheene Mädlschuah, in weiß und dunklblau geben, mid am gloana Absatz. Meine Leid hädn ma de bestimmd ned kaaft, weils ja ned Noud doo hod, und weils ma eigendlich aa z´gloa warn. Aba i woid de umbedingd hobn und i hob mi sakrisch gfreid, weil ma da Onkl Schoß de Schuah kaafd hod. De nächsdn Dog, hob i de Schuah aufd Nachd neba mei Bett gschdeid, damid es glei siehg, wenn i aufwach in da Friah.

Midm Schweinersdorfer Opa bin i aa amoi vom Moosburger Schwimmbod midhoamgfahrn. Mei Radl hod a hind in Koffaraum vo seim hellblaun Kadett do und na bin i mid eahm midgfahrn. Da Opa is dann aber no beim Wernerwirt eikeahrd, wo er si no oa oda zwoa Hoibe Bier kaafd und gradschd hod. I hob dawei mid am Schbuiaudomadn gschbiud, da Opa hod ma dafia a boor Zehnerl gebn. Und weil i imma wieda gwunna hob, hob i a aa ganze Zeid lang schbuin kinna. Auf jedn Foi, ham si d´Mama und da Papa dahoam scho Soagn gmachd, weil i ned zu da Zeid hoam kemma bin. I hob ja ma ja nix dabei dengd, weil da Opa dabei war und da Opa had si scheins aa nix dengd. I woas ned obs schdimmd, aba meine Leid ham gsogd, sie ham domois sogor bei da Polizei ogruafa.

Wenn i a so nochdeng, dadn ma no mehr so Gschichdln eifoin, de wo mid de Schweinersdorfa zum doa ham, aba irgndwann muass ma aa amoi aufhearn sonsd werds z´vui. I hoff es habds a Freid beim Lesn und vielleichd is ebba dabei, der wo si an de oane oder andane Gschichd erinnern ko, weil er vielleichd sogor seiba dabei war.

Aufgeschrieben am 12. Nov. 2012 von Irmi Schaffer, geb. Wiesheu (*1961), Moosburg

b30130_SI_Gloane_Gschichdn_aus_Schweinersdorf_by_16Mar14