Impn - Geschichten_by_v3

Impn

Nem de Sau warn de Impn aa no a Zeitvotreib vo unsam Oba.
Des warn a bor Voika im Impnhaus. Mei Oba hod des zamdt seim Oidda echt drauf g'habt und hod se oiwei guad drum kimmad.
Im Friajohr und im Summa, so lang's hoid warm war, warn de gloana Fliaga undawegs und hamd an Honig gmacht.

Wia mei Schwesta ungefähr drei Johr oid war, wars scho recht neigierig. Sie woit wissn, wo de Impn hi mächdnd, wens do in des Schlupfloch eine grabbend. Nachad is vor de Fluglecha vo de Impnkastn gschdana und hod mid de Finga nochebohrd, wo's eine geht. Zum Glück warn de Impn recht harmlos und si is blos a bor moi gschtocha worn.

Ab und zua, wenn ma de neie Königin ned glei und vorm Ausschliaffa dawischt hod, is a junga Schwarm abg'haud, um se mid de meistn vo dem bisherign Voik a neie Hoamad z'suacha.
Do hand mia Kinda nachad noche gschikt worn, damid man finand, wenn a se irgndwo, hoffntlich ned z'weid weck, auf an Ost hi gsessn hod. A diaweng hamd a se aa direkt a's Gros nei gsessn. Den Schwarm eiz'fanga, damid ma wieda a nei's Voik hod, war oiwei recht intressant. Sejdn is aa amoi a fremda Schwarm vobei gflong. Do hamd mia nachad gschaugt, daß ma den dawischnd. Mid laudn Dengln auf a oids Wogeisn oda Blechkiwe hod ma a so do, ois dads darn. An Kiwe voi Wassa hamma aa no dabei g'habt und mid an Schwamm oda an Maurawaschl hamma's obgschbrizt, damid's moanand es fangd 's renga o. Nachad hand's oft glandt.
Wenn a so a Schwarm vobei gflong is, hod ma's scho vo da Weidn g'head. Des hod recht brummd und gsummd.
Nochdem se da Schwarm zo oam oanzign Hauffa higsessn und beruigt hod, is a direkt in an Kar oda glei in sein neia Kastn einebeidlt oda gschaufed worn.

Wenn de Impn fleissig warn und de Wabn dahoam im Schtog voi Honig warn, is da Oba mid seina Pfeiff zom Honigschleidan kemma. In dera Pfeiff, do warn a bor oide Schtumpn und irgnd a andas recht schtingads Kraut drin. Mid dem hod er gracht, damid de Impn a Rua gem, wenn ma eana den Honig gschdoin hod. Er hod de owan Laddn, mid de wo da Impnschtog obdegt war, weckad do und de Impn, de do grod dro grabbed hand, mid an Fledawisch wegad kiad. De hand nachad vorn boim Schlupf wieda eine gflong. Damit's eam ned a so gschtocha hamd, hod mei Oba meistns no a Maskn auf g'habt. Des war a feina Schleia iwa an groussn Huad, der'n vom Gsicht weggad g'hoiddn hod, damit's ned durchschtecha kinnand. Sunst hod a zwar no a dicke Jopn o g'habt, damit do aa koana durcheschticht, owa meistns hod ohne Handschua und mid de blosn Hendt g'arwad. Er hod oafach koa Angst davo g'habt. Ab und zua hod a nachad scho gfluacht, wenn eam wieda a so a Schtanz zwickt hod. Mia Kinda hamd eam nachad den Angl raus ziang deaffa, weil er nimma so guad gseng hod - des war'n scho ziemliche Banzaglesa, de er zom Lesn braucht hod.

Bevor ma de Wabn in d' Honigschleida eine g'hengt hod, hand de Honigzoin mid'm Entdeckelungsgerät aufgmacht worn. Mia Kinda hamd uns meistns gschdridn, wer den letzdn Honig aus dem Wax vo de Deggln auszuzln hod deaffa und iwahapt, wer schleidan deaf.

Vom Schleidan hod's den Honig aus de Wabn ausse draht. Der is a da Wand vo da Schleidan drin owe glaffa und undam Auslaaf in a Schissl aufgfangd worn. Im Glos hod se der Honig mehrare Johr g'hoiddn. Weil aussa Honig sunst nix drin war - „bio" dat ma heid song – is a ungefähr noch an dreivierdldn Johr eizuggad. Wenn'sdn warm gmacht host, is a wieda dünna worn. So guad wia der Honig vom Oba hod sunst koana gschmegt.

Nochdem ma de Impn den Honig gschdoin hod, hamds ja nix mea zom Fressn g'habt. Drum hod ma's im Winta mid Zuggawassa gfuadad. Dafia is da Zugga im warma Wassa aufglest worn und in an Fuadatrog an Impnkastn am drauf, de Impn gem worn. Unsa Muadda hod oiwei recht gschimpft, weil da Oba dauand den ganzn Zugga vofuadad hod und nachad koana mea do war, obwoi man seckweis kaft hamd...

Im Winda hamma de Honigwabn gricht. Des hob meistns I macha deaffa. Aus Kunstwax vorgschdanzte Wabn hand mid an dickn hoassn Zimmaranogl, der vorn a Kerbn g'habt hod, mid zwoa ganz feine Draht in des Wabnramal eigschmoizn und in de Kantn mid hoassn Wax fest klebt worn. De Impn hamd nachad de Kunstwabn, auf dene de oanzejna Zoin blos ungefähr an hoiwadn Millimedda eigschdanzt warn, sejwa mid richtign Bienenwax auf de richtige Heng aufbaud.

Wia da Oba gschtarm war, hod unsa Vadda des Gscheft mid de Impn üwanamma.


Aufgeschrieben am 12. Okt. 2012 von Johann Wiesheu (*1965), München

b21080_WJ_Bienen_by_11Mai14