koa Schtrom - Geschichten_by_v3

by
de
fr
en
pl
Direkt zum Seiteninhalt

Hauptmenü

koa Schtrom

Gschichtn > domois, a's Johr üwa


Koa Schtrom

An 24. Abrui 1980 hod's an riesign Schtromausfoi in fast ganz Baian und aa z'Inzkofa gem. Z'wengs an Hauffa schwara Bappschnee hand umara siewazg Schtrommastn vo de Isar-Ambawerk obrocha.

Des war domois, vor iwa dreißg Johr, fast genau so schlimm wia heid. De auftaudn Gfrieatruhan und kabuttn Lemsmiddl warn do no des Wenigste.
Am Hof hamd zwoa moi am Dog dreißg Kia gmoicha wern miassn. Ohne an Schtrom fia d'Muichmaschi is des eigntlich kam ganga und a Aggregat hod ma aa ned so schnoi aufdreim kinna.


geknickte Strommasten; [BNEZA]

Do is guada Rod deia. Unsa Muadda hod scho ogfanga g'habt, hendisch z'muicha, owa noch 6 Kia hod's kam mea kinna. Nembei hod unsa Vadda scho gschaugt, das des irgndwia andascht geht.
Mid an schtaradn Schlauch hod ea des Vakuumrohr vo da Muichmaschi an Luftfilta vom Bulldog ogschlossn. Durch den Sog vom Modor is wenigsdns oans vo de Muichgschira glaffa. Owa wiaggle guad is des ned ganga, weil ma recht aufbassn hod miassn, daß da Modor ned zweneg Luft griagt hod und obgschtarm oda kabutt ganga is. Fia d'Muichmaschi war's owa aa ned so guad und wenn des Vakuum ned genau gschdimd hod, nachad hamd de Kia a Eidaentzündung griagt, wos aa ned guad war. I kon me no erinnan, wia unsa Vadda a Schnur schtramm um den Schlauch bund'n hod, damit'sn ned zamziagt. Des hod owa ned vui g'hoiffa.
Nochdem ma de Kia gmoicha g'habt hamd, hod scho des nexde Problem g'wart: Ohne Schtrom is a de Kühlung vo da Muich ned ganga. Wenn's ned koid gmacht wern hod kinna, hand aa ganz schnej Keime in da Muich drin gwaxn und ma hods nimma vokaffa kinna. Drum hod da Muichwong auf d'Nocht und in da Fria kemma miassn.

Gfrieahaus

Des Fleisch vo a na ganzn ogschtochan Sau ei zo macha war fria ned oafach. Aussa driggan, eisoizn oda sejcha hod's do ned vui Meglichkeitdn gem. Guad, daß irgndwann de Kejdnmaschi baud hamd. Zwar hod's scho vialeicht Kühlschrank bis zu de 60er Johr gem, owa Gfrieadruan hamd de meistn Leid no ned g'habt.

Z'Hoslboch neman Lagahaus war unsa Gemeinde-Gfrieahaus. Do hod's an Kühlraum fia a ganze Sau gem und aa no schtuggara dreißg Gfrieafächa, ungefähr an viertldn Kubikmedda grouß. De warn in zwoa Reian nemmananda aufgschdoid und hamd an diggn Deggl amad zom Aufglabbm g'habt. Zuagschbard war des Fach mid am oafachn Vorhengeschloß. Des war wahrscheinlich zo oafach, weil oiwei wida wos weggad kemma is.
Im Gfrieafach is ois eigfroun worn, wos ma eifriean hod kinna.
An Hauffa Gmias und Budda und des Fleisch vo da sejwa gschlachtn Sau. Des war oft so voi, daß ma no a zwoats Fach nemma hamd miassn. Noch de drei Dog Schtromausfoi war freile aa des meiste im Gfrieafach hi.


Singal
Zo dera Zeit hamma grod seid a bor Dog ganz gloane Singale im Healheisl hintam Haus g'habt. Damit de ned dafroun hand – im Abrui war's ab und zua no recht frisch auf d'Nocht – hands mid a na Faggelambm gwarmd worn. Awa ohne Schtrom hod's a koa Wim gem. Drum hamma's oafach dawei a's Haus eine g'hoid. Im Bauschn-Schuwa vom Ofa undn drin war's oiwei schee warm und es hod eana recht daugt.


 Herd in Inzkofen; [JWC13]

Aufgeschrieben am 7. Dez. 2012 von Johann Wiesheu (*1965), München


Am 15. November 2012 blieb Inzkofen verschont:

Inzkofen verschont, Moosburg dunkel; [WELT2]

b21090_WJ_Stromausfall_by_11Mai14

Zurück zum Seiteninhalt | Zurück zum Hauptmenü