Kiachaschlüssl < - Geschichten_by_v3

Dia zua – Schlissl drin

ned wia ma jetz moana dat, bei da Hausdiar, sondan bei der Kiacha z' Inzkofa.

De gloane Kiacha z' Inzkofa is glei neman Wimmahof. Drauf is ma ganz schtoiz, ma hod owa aa an hauffa arwad damid g'habt.
Fria is an jedn Dog, wo d'Sunn gscheid hod, scho am Vormiddog de Kichadia aufgmacht worn und auf d'Nocht wieda zua. Und wer war dafia zuaschtendig?
Oiwei da gleanste Wimma, oiso aa amoi I.

A blede Gwonheid wars, das ma den Schlissl noch'm Aufschparn irgndwo in d'Kiacha eine do hod. Bessa war's gwen, wen man ned aus da Hand glegt häd und eam glei wieder hoam brocht häd. Owa in da Kiacha is a scho recht guad aufgschbord und kon ned valoun geh, bsondas, wen a andara auf d'Nocht de Kiachadiar wieda zuaziagt! Drin wara, da Schlissl - do kost da wos eifoin lassn.

Neman Oidor gibts zwoa Fensta, ans links und oans rechts, recht gloa und davor mit zwoa Eisnschtangl gsichad. Oans davo war im Summa oiwei auf. Und jetz hods wieda amoi des schmoiste Wimmakind dawischt. Vo da Axl vom Vadda bin I auf des Fenstabange gschting. Eighengt hob I mi a de Gittaschtab und nachada bin I durch de Schtangan und des dreiteilige Fensta gschloffa. Drin hod ma se kam mid de Fiaß hodn kinna, weil 's Fenstabange recht schteil owe ganga is. Do hod ma blos gschwind und gnau aufn Oidor ume schpringa kinna. Wenn ma dort guad glandt is, war's gschafft. Jetz war I da Hoid. I ganz aloa war's, der die schware Diar vo drinnad aufmacha hob kinna. De bor Minudn, bis me d'Sun wieda vo daustn ogscheid hod, hob I groad leidn meng.

Wenn I jetz in dem Kiachal schteh, frog I me, ob oana vo de Voafahn vo mia a Eidaxl oda a Schlangnmensch war. Wia I do iwahaubt duachebasst hob?

De Schlissl-Rettungsaktion hob I in meina Kindheit efta macha deffa, bis I des Amt auf mein gloana Bruada abgem hob.


Aufgeschrieben am 23. Okt. 2012 von Irmgard Kratzer, geb. Wiesheu (*1968), Moosburg

b30110_KI_Kirchenschlüssel_by_11Mai14