Moped - Geschichten_by_v3

A Lausbuamgschicht

Frias ham de Kinda in da Landwirtschaft und im Haushoid mithäifa derfa und miassn. So war´s a bei uns, und mia warn deshoib für de oafachan Arbadn und für´s Eikaffa zuaständig.

De meistn Lebnsmittln hama mia ja säiber ghabt. Aba zwoa moi in da Wocha san mei Bruader und i zum Krama gfahn um Brot und Semen eizkaffa.
Olle poor Wochan is dann unsa Muadda in Tschod gfahn und hot des brocht, wos mia sonst no braucht ham.

Ois 13jahriga bin i domois a scho mit´m Moped vo meim Vadda gfahn. Er hot´s ja nimma braucht, nochdem er sich a Auto kafft hot.
Wei unsa Sache zimli obgleng war und es a blos oafache Fäidweg um uns herum gem hot, hob i des Moped im engan Umkreis imma wida amoi ausprobiert. Und do hob i ma denkt, das i zum Eikaffa des Moped genausoguad hernema kannt.
Des hob i a dann meina Muadda gsagt und sie hot dann gmoand, das i blos zum Doarfanfang fahn soi und das sie davo nix wissn derf.

Und so bin i nachad, mit meim domois 8jahrign Bruada auf´m Rücksitz, losgfahn.
De Daschn hob i am Lenka noghenkt. Und so san ma dann an Fäidweg der Bahn entlang bis zum erstn Haus gfahn. Do san ma dann vom Moped obgsting und mei Bruada is zum Eikaffa weidaglaffa.

Wia er wida zruckkema is und i des Moped gstart hob, hot uns plötzli a VW Käfa an Weg vospert. A Schande in Uniform is ausgsching und hot uns gfragt: "Na wos deats denn ia do? Du host doch no koan Führerschei! Wissen des den eire Äitern?

Mia Zwoa warn ganz schee daschrogga und i hob dann gsagt, das unsa Muadda nix davo woas. Mia ham eam dann unsa Telefonnumma gem miassn. Dann hot er mia an Zündkerznschlüssl gem und verlangt, das i damit de Zündkerzn vo unsam Moped rausschraub.
Er hot de Zündkerzn gnomma und dann gmoand, das de unsa Vadda bei eahm wida abhoin kant und mia soin des Moped mitananda hoamschiam.

Da Schande is dann mit seim Auto zu seina Dienststäi gfahn, hot unsa Muadda ogruafa und ia vo uns vozäit. De hot eam dann vorklunkat: „De Lausbuam, de wean wos erlem, wenn´s wida hoamkema".
Da Schande hot unsa Muadda beruhigt: „San´s net so streng, des san doch no Buam".

Unsa Muadda is uns dann mit´m Bulldog entgengfahn, hot s´Moped aufglegt und uns hoamgfahn.

Sie hot dann zu uns gsagt: „past scho, s´nächste Moi derfs nimma so weit fahn". An des hama mia uns dann a ghoitn.

Unsa Vadda hot übrigens de Zündkerzn nia beim Schande obghoit – mia ham ja no mehrere ois Ersatz ghabt.


Aufgeschrieben im September 2012 von Leonhard Maier (*1953), Giggenhausen

b30060_ML_A_Lausbuamgschicht_by_07Mai14