Fohrschtund - Geschichten_by_v3

Fohrschtund

Wo mia ois Kinda a's Schteiaral hamd hoidn kinna, hand mia aa scho an Bulldog aufe gsessn worn. Erscht amoi blos auf'm Agga, um langsam fiare z'fohrn und schpaada, wo ma a bissal oidda warn, aa vom Fejd hoam. Do hod ma se scho machtig wos eibuidt, wenn ma des ois Bursch zum erschtn Moi aloa deaffa hod. An Führaschei hod ma freile no ned g'habt, owa do an Darf war aa no ned so vej Vokea. Domois war hoid des oiss no a bissal oafacha.

Je ejdda mia worn hand, desto gressa hand aa de Fohrzeich worn, mid dene mia aloa untawegs warn. Owa wenn'st irgndwann den ganzn Dog auf'm Agga auffe und owe fohrn host miassn, nachad war des Arwad und koa Schpass mea. Es war zum Teil recht laud – auf d' Oun hod ma no ned aufbasst – und oft aa recht schtabig. Do hod ma hoid nimma deaffa, sondan miassn.

Mid deara Erfahrung hob I nachad aa scho a moi an Sunda vor da Kiacha 's Audo aus da Garasch raus fohrn deaffa.
Oda aa an Oba sei Auto viare fohrn, wenn er an Sunda Nomidog an Ausflug macha woit. De Weg und Schtrassl um's Darf rum hod ma ja mid da Arwad 's ganze Johr scho guad g'kennt. Zamdem war I recht aus'm Heisl, wo da Oba nachad g'sagt hod „So, jetz fohrst me du auf Hoslboch". Do hoda mia wirklich wos zuadraut und I bin wahrscheinlich a bor Zandemedda gressa worn. Mid dem Auto- und Bulldogfohrn is domois ois junga Bursch scho recht vej Erfahrung zammad kemma.
Ois näxsts hob I nachad den Oba boid auf Schweinasdarf a's Grob und zom Huaba, wo er dahoam war, naus fohrn deaffa. Des war scho ganz wos andas, weil des a gousse Schtrass war mid Vorfahrt und Obbiang und aa andane Gschban iwahoin. Dreizehn Johr war I domois oid. Des hod owa ois recht guad hi g'haud - da Oba hod des scho g'kennt. I glaab owa, daß da Bapp und d'Mamm des domois no ned ois so gnau mid griagt hamd und wahrscheinlich erscht vej schpada gmeagt hamd, wia weid mia domois untawegs warn. Langsam hand de Ausflüg vom Oba und mia oiwei weida worn. Mid da Zeit hand mia de ganze Gmoa und den hoiwadn Landkreis ob kemma und des Autofohrn war ganz normal. Aussadem hod da Oba in seim Oidda nimma so guad g'seng und a so war des ja eigntlich sichara, wenn ebba an Iwablick g'habt hod :-)
Wia I 14 war, hob I eam zo seina Basl auf Baagartn gfohrn oda zu de Moosbacha naus, oiso quer durch d' Holladau. Domois hod ma da Oba de ganzn Schleichweg zwischen Moaburg, Attnkiacha und Mooschburg zoagt. Ois junga Bursch hob I do scho an Hauffa Fahrerfahrung sammen deaffa. Do i's nachad mid'm Führaschei glei vej schneia ganga.

Wo ma unsa Vowandschaftstreffn im Friajohr 2012 organisiert hamd, hob I midgriagt, das des Vodraun in de Enkl scheinbar a Charaktarzug in unsana Sippschaft is. Aa andane Veddan und Basn hamd ab und zua eanen Oba auf a Schtiggal Kuacha oda auf an Ratsch im Wirtshaus ins iwanexde Darf gfohrn und se recht grouß am Fahrasitz gmacht, wenn amoi d' Bolezei an Wech kemma is...

Oiso schnoi g'fohrn is ma bei uns oiwei gern. In de Siewazga Johr hamd mia ans 2000er BMW g'habt. 100 PS hod der g'habt und is recht guad ganga. Mid dem hod ma auf dem kurzn Schtiggal zwischn Hoslboch und Inzkofa sogor gnabbe 100 gschaft. Des hod aussa mia warscheinlich koana brobiert.

Unsana Muadda hods aa oiwei recht bressiert. I woass no, wo ma amoi auf Mooschburg zom Eikaffa g'fohrn hand. Mei Schwesta und I warn aa dabei. Nochdem de Zeit scho recht gnapp war, is's hoid a bissal schneja g'fohrn. Glei noch da Ampabruck, de domois no fia jede Richtung a eigene Bruck g'habt hod - auf Mooschburg eine de oide Behejfsbruck vom Kriag no - is's aufamoi nimma weida ganga. Wia d'Mam des gseng hod, hod's aa glei gmerkt, daß zom Brems'n nimma glangt. Wos macht sie? Damit nix bassiert, is an Schtraßnrand ausse gfohrn. Blos bled, daß genau dortn bei da Eifohrt zo dera Gärtnarei, wo's ausse g'fohrn is, a recht a diaffa Grom war. Do hand mia nachad owe gschossn. Total schräg is z' Auto zum Schtea kemma. Bassiert is koan wos, aa ned an BMW, owa sejwa raus kemma is's hoid nimma. Des hod unsa Muadda echt guad gmacht, weil ma sunst ned so oafach, ohne daß ebban wos bassiert is, davo kemma warnd, weil Sichaheitsgurt hod's domois no ned in olle Auto gem. Fia ihr Formel-1 Fohrweis war unsa Muadda scho bekannt...

De Hena auf unsam Hof dahoam hamd eigntlich recht gsund und z'friedn glebt, weils iwaroin omananda laffa hamd deaffa. Owa nochdem olle meine Gschwista und I mid'm Auto untawegs warn, hand de Hena aufamoi oiwei friaa g'schtarm. Worum woaß ma ned...


A andamoi hod uns unsa Muadda vozoid, daß si ois jungs Deandl aa scho recht intressiert war, wenn's um schneje Fohrzeich ganga is. Irgndwann is ihr Bruada mid an Modorral hoam auf'n Hoizahof z'Amba kemma. Und freile hod sie aa glei a Rundn fohrn miassn, wenigstns um an Hof rum, wo da Misthauffa in da Mitt war.

Noch a bor Rundn war de Freid aa vobei und sie hed wieda hoidn soin. Blos iwa's Schtadhoiddn hod a se vorher koane Gedankn gmacht und sie hod na ned gwisst, wia ma den Gang aussa duad oda an Modor obschtejd. Sie hod se kam mea an Rod gwisst, nachada is auf de geniale Idee kemma, an Misthauffa eine z'fohrn. Do is des Modoral recht leicht zom Schteh kemma und ihra is aa nix bassiert. Meara Angst hod ihr Bruada um des Modorral g'habt, dem owa noch dera woachn Landung aa nix g'feid hod.


Aufgeschrieben am 12. Okt. 2012 von Johann Wiesheu (*1965), München

b30080_WJ_Fahrstunde_by_11Mai14