Flieder - Geschichten_by_v3

Da Fliedabam

Solang I mi erinnan ko, hamd mia dahoam des Hei mid'm Ladewong hoam gfohrn und mid'm Gebläse an Heibon auffe blosn. Des war aa ned ganz ungfährlich, weil ma hod do leicht mid da Gowe z'weid a's Gebläse eine kemma kinna. Do iss vor kemma, daß nachad de Gowe zruck g'haud worn is oda aa a Zinkn omananda gflong is. Wenn amoi a Schtoa eine kemma, is nachad hod dea aa ganz schee durch's Rohr gschewad...

Des Gebläse war eigntlich ganz bracktesch, weil 's Hei damid in a jed's Eck an Heibon amad hiblosn hod wean kinna, ohne daß ma's no amoi oglanga hod miassn.
Owa weil des Hei nachad recht festblosn war, war's hernoch im Winta oftmois koa leichte Arwad, es wieda aus'm Heischtog raus z'bringa, wenn ma's foisch oganga is. Wenn'st mid'm Heihaggl gnua logga gmacht g'habt host, is durch's Heiloch an Schtoi owe gschmissn worn. Oamoi hob I ned aufbasst, no im oidn Schtoi, nachad bin I durch's Loch owe gflong und undn an Fuadagang glandt. Do hob I blos a Massl g'habt, daß scho a Hauffa Hei undn gleng is und koa Gowe drin gschdeckt is. Drum bin I recht woach glandt.

Weil unsa Vadda a so a Bronchitis g'habt hod, hod er den Heischtab nimma aushoiddn kinna.
D'rum is a Houchdruckbress mid a na Schleidan hindn dro kafft worn. De Schleidan hod de Heibischl glei an Gitta-Wong auffe gschmissn, der a da Bress hindn o'ghengt worn is. Des war a Gummiwong mid an Aufbau umara zwoameddasiewazge broad und vialleicht dreimeddafuchzge houch. Dahoam hamd mia de Bischl na an Boinlift eine g'schteckt. Der hod's auf de lange Bahn auffe zong, vo dera's nachad den ganzn Schtoi lang undam Firscht viare g'fohrn worn hand. Mid an Scherblech hand's do aus da Bahn brocht worn, wo ma's owe foin lassn woid. Dort'n hand nachad grousse Berg mid Heibischl bis zo dera Bahn auffe gwaxn. Blos unta's Doch hand's ned weid eine kuglt. Do hod ma's wida mid da Gowe hintre schmeissn deaffa, damit da Bloz bessa ausgnuzt worn is. Bei 45° direkt undam Doch war des a recht a schtabige und schware Arwad! Do war ma auf d'Nocht wirkle fiadde. I waar domois liawa zom Boon ganga...

Aa des Bressngschbann z'fohrn war ned ganz oafach. Bulldog, Bress und Wong hand guade 15 Medda lang und hamd drei Glengga: wo de Bress an Bulldog og'hengt is, de Deixl vom Wong, wo's a da Heibress og'hengt is und nachad no des Drahgschtoi vo da Vordaax vom Wong sejwa. Wenn's mid dem a bissal ranschiern host kinna, nachad war des scho a Kunst.

Irgndwann hob id des Gschbann an Nomiddog vo da Woad hoam fohrn miassn. Weil mia ja scho vo gloa auf ogleand worn hand, war des aa koa Akt. De Hofeifohrt dahoam war a bissal schmoi. Drum hob I genau aufbasst, daß I ned mid'm rechtn Eck vom Gittawong a's Hauseck one fohr. Der Sichaheitsobschtand war wahrscheinlich a bissal z'grous, a so, daß des andane Eck vom Aufbau am Wong auf aona Ostgowe vom Fliedabam dro hengad bliem is. Der Flieda war scho recht oid und houch gwaxn. Eigntlich war a scho a richtiga Bam mid vialleicht fünfadreißg oda viazg Zandemedda Schtammdurchmessa und schtuggara sex Medda houch. Wenn der bliad hod, nachad hod da ganze Hof danoch gschmegt. Drunta is des Bange g'schtanna, des se scho manchn Ratsch ohean hod deaffa. Wahrscheinlich waar der Fliedabam beim näxdn Schturm eh umgflong, owa leida hoda den nimma dalebt. Weil se der Ost an Wong eighengt hod, is da ganze Fliedabam umgfoin und ois riesiga Busch neman Wong und iwa d' Hundshiddn driwa zom leng kemma. Des hod an Hund aa ned gfoin, weil er mid eizonga Schwanz obg'haud is.
A Kataschtroph!
Und I war schuid. I woit am liabstn nimma do sei.

Wos jetz? Do ko ma nix mea macha. Des schlechte Gwissn hed me fast umbrocht.
Bis jetz hod's no koana gseng, weil oisam no dausdn auf da Woad des letztde Hei zamgrechad hamd. I hob mia des nexte Fohrzeich gnamma und bin ausse g'fohrn, damit I's scho amoi drauf eischtejn ko. Sie hamd's ned glaabt, wo I eana vozoit hob, wos bassiert is.
Wia's hoam kemma hand, da Fliedabam is oiwei no neman Wong gleng, und des Schlamassl gseng hamd, is wos bassiert, wos I ned glaam hob kinna – nemlich nix! Koa Fluacha und Ärga oda Schimpfa. Oafach gor nix. Da Fliedabam is mid da Modorsoch ausananda g'schnin und weg gramd worn. Koana hod mea driwa g'redt. Wahrscheinlich hamd's eigseng, daß I mid meine 13 oda 14 Johr oafach z'jung war....
Konsequenzn hod des Malear koane g'habt. Eha 's Gengdej. Wia I a bissal oidda war, bin I mid dem Gschban zo de Nachbardärfa g'schigt worn, um dortn des Schtrou vo de Fejda weggad z'bressn. A so hob I mia aa a bissal a Daschngejd dazua vodeana kinna. Bassiert is nia nimma wos.


Aufgeschrieben am 12. Okt. 2012 von Johann Wiesheu (*1965), München

b30090_WJ_Flieder_by_11Mai14